Um vef og verkefni

Hér á vefnum má finna fjölbreytt verkefni sem tengingu hafa við umhverfið, náttúru eða menningu. Þeim er ætlað að auðvelda og vekja áhuga kennara á átthagafræði og staðtengdu námi, þannig að markvisst megi efla skilning og þekkingu leikskólabarna á eigin heimabyggð. Verkefnin tengjast heimabyggð höfundar og umhverfi leikskólans Kríubóls á Hellissandi og þar er lögð áhersla á að efla átthagafræði og staðtengt nám í leikskólanum. Því fylgir sú von að verkefnin geti verið öðrum leikskólum innblástur að skemmtilegu útinámi með markmið átthagafræði og staðtengds náms að leiðarljósi.

​

Markmið með verkefnunum er ekki einungis að fræðast um eigin heimabyggð, heldur líka að kennarar þjálfist í því að sjá námstækifærin sem þar felast og öðlist færni í að nýta þau. Nemendur fá tækifæri til þess að byggja á fyrri reynslu úr eigin umhverfi, læra um það, í gegnum það og af því, og þannig má ná fram mikilvægum markmiðum í leikskólastarfi. Tengsl verða til á milli hins þekkta og óþekkta, börnin kynnast eigin menningu og samfélagi, reynsla og þekking aukast og nemendur fá með því tækifæri til þess að hafa áhrif á eigið samfélag.

​

Verkefnin sem hér eru sett fram eru aldursmiðuð og tengd vissum stöðum í umhverfi leikskólans Kríubóls. Leikskólinn er umkringdur náttúruperlum og umhverfið býður upp á mörg námstækifæri sem nauðsynlegt er að nýta og tengja við grunnþætti aðalnámskrár. Með vefnum fylgir greinargerð og má nálgast hana hér.