Átthagafræði og staðtengt nám í heimabyggð leikskóla
Uppspretta tækifæra til leiks og þroska
1. Dúllerí á Drimbum: Náttúra og börn
Markmið
-
Að nemendur átti sig á fjölbreytileika plantna allt frá áferð, lögun, stærð, lit til sérstakra eiginleika.
-
Að þeir geti frjálsir og eftir áhuga upplifað og rannsakað eigin náttúru í fallegu umhverfi.
-
Að þekkingarferli og -öflun geti haldið áfram þegar heim er komið í leikskólann.
Viðfangsefni
Gengið er að Drimbum eða að öðru stóru opnu svæði sem gefur nemendum tækifæri til að rannska og upplifa fjölbreytileika plantna á eigin forsendum. Meðferðis þarf að hafa bókaplast (jafnvel krossviðarplötu til þess að líma bókaplastið á), tape-límband og bók um plöntur. Bókaplastinu (með límflötinn upp) er tyllt með tape-límbandi á krossviðarplötuna eða nokkuð sléttan flöt í náttúrunni, til dæmis stóran stein. Nemendum eru gefin fyrirmæli um að finna og tína plöntur sem vekja áhuga þeirra og setja á bókaplastið. Þegar lokið hefur verið við að fylla listaverkið er bókaplastinu lokað með öðru bókaplasti og það tekið heim í leikskólann. Til verður minning um ferð á viðkomandi stað og námstækifæri innan leikskólans. Eru blóm í fjölbreyttum litum á myndinni? Hvað eru mörg blóm á myndinni? Stór og lítil blóm og svo framvegis.
Leiðir
-
Vettvangsferð þar sem bæði er áætlað að tína og líma plöntur á bókaplastið. Um leið fræðast úti í guðs grænni náttúrunni um plöntur og eiginleika þeirra og að sú fræðsla haldi áfram í leikskólanum.
-
Vettvangsferð þar sem markmiðið er einungis að tína plöntur og taka með heim í leikskólann. Þar er bókaplastinu tyllt upp með tape-límbandi jafnvel út í glugga eða á vegg og nemendur velja hvaða plöntur skal líma á bókaplastið. Plöntubókin er höfð með í stundinni og fræðst um plönturnar.
Hluverk kennara
Er að fanga augnablikin sem gefast til þess að grípa áhuga og þannig efla þekkingu barna á fjölbreyttum plöntum. Að geta svarað spurningum um plöntur og þess vegna er gott að búa sig undir verkefnið og hafa plöntubókina meðferðis í vettvangsferðina. Nemendum á leikskólaaldri finnst mjög spennandi að leita svara í stórum bókum. Að þekkingaröflun sé haldið áfram þegar aftur er komið í leikskólann.
Uppruni hugmyndar: https://www.messylittlemonster.com/2015/05/Flower-petal-paper-plate-suncatcher-craft.html
2. Eins og fuglinn frjáls
Markmið
-
Að nemendur geti leikið og uppgötvað frjálst um svæðið Drimbur sem býður upp á fjölbreytta möguleika til hreyfingar og sköpunar
Viðfangsefni
Frjáls leikur og hreyfing í fallegri náttúru sem einkennist af grænni flöt, hólum, hæðum og skemmtilegum leynistöðum sem geta auðgað og gert leiki nemanda spennandi og lærdómsríka.
Leiðir
-
Vettvangsferð að Drimbum þar sem nemendum er gefinn kostur á því að leika og hreyfa sig frjálst um svæðið, uppgötva og efla félagsleg tengsl í gegnum leik.
-
Myndavél höfð meðferðis til þess að bæði nemendur og kennarar geti tekið myndir. Myndirnar hengdar upp í leikskólanum sem veita áframhaldandi tækfifæri til frásagna og umræðna.
-
Að vettvangsferð lokinni er gagnlegt að skrá upplifun nemandanna. Hér má finna skráningarblaðið.
Hlutverk kennara
Að vera virkur þátttakandi á forsendum nemenda og geta í gegnum leik þeirra séð og gripið námstækifæri og nýtt þau. Mikilvægt er einnig að ef upp koma spurningar sem ekki er hægt að svara á staðnum að finna svör þegar heim er komið í leikskólann.